إتقابلت أنا وأصحابي بعد غياب فترة أجازة نص السنة اللى كل واحد كان مشغول بأهله وحياته .
حمد لله على السلامة يا جيهان ، إحكيلنا عن رحلة دهب ، عملتي إيه ؟.
أنا مش هأحكيلكوا عن جمال الطبيعة والمناظر الخلابة من جبال وبحر وسما ولا الجو الجميل ولا أى حاجة من الناس اللى بتحكي عليها لما ترجع من هناك ،
أنا هأحكيلكوا عن حاجة تانية خالص حصلت فى الرحلة.
شوقتينا !! كنا متوقعين فعلاً تتكلمي عن الحاجات دى وبالتفصيل😊.
إنتوا عارفين إنى سافرت مع إخواتى وولادهم من سن ولادى ميار ويوسف .
فعلا هم متربين مع بعض و فى مدرسة واحدة و سنهم فى إعدادى من سن بعض .
كنا راكبين الباص ومروحين والطريق كله مناظر خلابة و كانوا الولاد قاعدين مع بعض بيتفرجوا و بيتكلموا طول الطريق .
إحنا إتبسطنا أوى فى الرحلة دى مكنتش عارفة إن دهب حلوة أوى كدة حتى الطريق يجنن .
فعلا يا ميار ، أنا كمان إنبسطت اوى ده حتى الأوتيل جميل و المنظر من الأوضة يجنن و صاحية على جو هادى وجميل و نمت فى سابع نومة ، مش عارفة الأوتيلات بتجيب المخدات والمراتب دى منين ؟!!.
لو دهب حلوة أوى كدة ، طيب الجنة شكلها إيه ؟!!.
فاكرين مس رضوى كانت دايما بتقولنا (ما لا عينٌ رأت ولا أذنٌ سمعت ولا خطرَ على قلبِ بشرٍ)
ياااه يا رنا , يعنى كل اللى شوفناه ده مش الجنة ؟ ده الواحد نفسه و بيتخيل إنه يكون فى الآخرة فى مكان زى دهب ، أكيد متعة .
مس رضوى يا يوسف كانت دايماً بتقولنا إقروا سورة الواقعة عشان بتوصف الجنة و تخيلوها وأنتوا بتقروها.
إستنوا كدة أشوف فى جوجل سورة الواقعة و نشوف وصف الجنة .
الله يا جيهان ، مين مس رضوى اللى فاكرين كلامها أوى كدة ، ده ولادنا بينسوا كل حاجة إتقالت فى المدرسة في نفس اليوم اللي بيرجعوا فيه !!!
مس رضوى مدرسة العربى والدين فى مدرستهم ، الولاد كلهم بيحبوها و بيسمعوا كلامها .
إستنوا أكمل .
ما تقوليش إنهم عملوا كدة فعلا و فتحوا جوجل عشان يعرفوا وصف الجنة ؟!!
أيوة ، تخيلوا ؟! أنا وإخواتى كنا بنسمعهم وهم بيتكلموا بإنسجام رهيب.
لاقيت يا رنا آيات وصف الجنة فى سورة الواقعة ، طيب إقريها يا ندى .
(وَٱلسَّٰبِقُونَ ٱلسَّٰبِقُونَ (10) أُوْلَٰٓئِكَ ٱلۡمُقَرَّبُونَ (11) فِي جَنَّٰتِ ٱلنَّعِيمِ (12) ثُلَّةٞ مِّنَ ٱلۡأَوَّلِينَ (13) وَقَلِيلٞ مِّنَ ٱلۡأٓخِرِينَ (14) عَلَىٰ سُرُرٖ مَّوۡضُونَةٖ (15) مُّتَّكِـِٔينَ عَلَيۡهَا مُتَقَٰبِلِينَ (16) يَطُوفُ عَلَيۡهِمۡ وِلۡدَٰنٞ مُّخَلَّدُونَ (17) بِأَكۡوَابٖ وَأَبَارِيقَ وَكَأۡسٖ مِّن مَّعِينٖ (18) لَّا يُصَدَّعُونَ عَنۡهَا وَلَا يُنزِفُونَ (19) وَفَٰكِهَةٖ مِّمَّا يَتَخَيَّرُونَ (20) وَلَحۡمِ طَيۡرٖ مِّمَّا يَشۡتَهُونَ (21) وَحُورٌ عِينٞ (22) كَأَمۡثَٰلِ ٱللُّؤۡلُوِٕ ٱلۡمَكۡنُونِ (23) جَزَآءَۢ بِمَا كَانُواْ يَعۡمَلُونَ (24) لَا يَسۡمَعُونَ فِيهَا لَغۡوٗا وَلَا تَأۡثِيمًا (25) إِلَّا قِيلٗا سَلَٰمٗا سَلَٰمٗا (26))
انا فى حاجات مش فاهماها ، إنتوا عارفين العربى عندى فيه مشكلة 😊
الجنة درجات يا يوسف و ربنا وصف جنات النعيم ، جنة كلها نعيم وخلود للأبد
( ثُلَّةٞ مِّنَ ٱلۡأَوَّلِينَ وَقَلِيلٞ مِّنَ ٱلۡأٓخِرِينَ )
يعنى الجنة دى هيدخلها ناس كتيرة من اول الزمن وناس أقل بكتير فى آخر الزمن .
( عَلَىٰ سُرُرٖ مَّوۡضُونَة )
الناس قاعدة فى سراير مترصصة جنب بعض بالذهب والفضة و اللؤلؤ
(مُّتَّكِـِٔينَ عَلَيۡهَا مُتَقَٰبِلِينَ)
قاعدين براحة واستقرار و طمأنينة و وش كل واحد فى وش صاحبه بيشوفوا بعض مش بس بوشوهم الصافي ، بقلبهم النقى
( يَطُوفُ عَلَيۡهِمۡ وِلۡدَٰنٞ مُّخَلَّدُونَ )
.بيخدم عليهم ولاد صغيرين فى السن وشكلهم جميل و هيفضلوا شكلهم صغير و جميل للأبد
(بِأَكۡوَابٖ وَأَبَارِيقَ وَكَأۡسٖ مِّن مَّعِينٖ ) بيلفوا عليهم بكوبيات بغطا و من غير غطا فيها خمرة . بس مختلفة عن الدنيا طعمها حلو و مش مضرة
( لَّا يُصَدَّعُونَ عَنۡهَا وَلَا يُنزِفُونَ ) مش هتصدعهم زى ما خمرة الدنيا بتصدع الناس اللى بيشربوها
( وَفَٰكِهَةٖ مِّمَّا يَتَخَيَّرُونَ) وفاكهة بشتى انواعها واللى تيجى على بالهم او نفسهم فيها
( وَلَحۡمِ طَيۡرٖ مِّمَّا يَشۡتَهُونَ) كل أنواع الطيور اللى نفسهم فيه مشوى ولا مقلى أو بأي طريقة تحبوها
( وَحُورٌ عِينٞ) الحور دى الست اللى عينها جميلة اوى و تبقى ست جميلة من جمال عينيها الواسعة و المتكحلة
( كَأَمۡثَٰلِ ٱللُّؤۡلُوِٕ ٱلۡمَكۡنُونِ ) زى اللؤلؤ فى لونه الابيض الناصع وجماله اللى بيخطف العين والمستخبى جوة الصدفة عن العين و الهوا و الشمس زى ما بيقولوا كامل الاوصاف
(جَزَآءَۢ بِمَا كَانُواْ يَعۡمَلُونَ) وده عشان اللى عملوه فى الدنيا ربنا جزاهم كل النعيم ده
( لَا يَسۡمَعُونَ فِيهَا لَغۡوٗا وَلَا تَأۡثِيمًا إِلَّا قِيلٗا سَلَٰمٗا سَلَٰمٗا )
مش هيكون فيها غير كل كلام طيب و لا كلام مفهوش فايدة ولا كلام حد يآخد عليه ذنب .
كلهم ردوا فى نفس واحد (الله 😍)
طيب نعمل إيه عشان ندخل الجنة ؟!!
اكيد يا ميار نصلى و نصوم و ما نعملش حاجة وحشة .
طيب ما تشوفى كدة يا رنا فى جوجل يمكن نلاقى أسباب تانية ندخل بيها الجنة .
وقعدت رنا تدور بتركيز و باقي الولاد قاعدين يبصولها بترقب و فضول ، وكلنا الكبار كنا زيهم مستنين في أجمل مشهد من مشاهد الرحلة كلها .
ده فى حاجات كتيرة اوى تدخل الجنة ، الواحد يقول لا اله الا الله ، حسن الخلق، الصلاة والصوم زى ما ندى قالت ، الصدقة ، اطعام الطعام .
يعنى إيه إطعام الطعام ؟
يعنى يا يوسف تقدم الاكل لحد فقير او مسكين ولكل محتاج ،
فعلا ؟!! يعنى الاكل اللى بنوزعه انا واصحابي فى رمضان كل يوم على الفطار بيكون سبب فى دخول الجنة ؟!!
ايوة يا يوسف ده ربنا ذكر كمان وصف ليهم مخصوص وهم فى الجنة ،
إيه ده بجد ؟ ايوة يا يوسف ربنا سبحانه وتعالى قال في سورة الإنسان
(إِنَّ ٱلۡأَبۡرَارَ يَشۡرَبُونَ مِن كَأۡسٖ كَانَ مِزَاجُهَا كَافُورًا (5) عَيۡنٗا يَشۡرَبُ بِهَا عِبَادُ ٱللَّهِ يُفَجِّرُونَهَا تَفۡجِيرٗا (6) يُوفُونَ بِٱلنَّذۡرِ وَيَخَافُونَ يَوۡمٗا كَانَ شَرُّهُۥ مُسۡتَطِيرٗا (7) وَيُطۡعِمُونَ ٱلطَّعَامَ عَلَىٰ حُبِّهِۦ مِسۡكِينٗا وَيَتِيمٗا وَأَسِيرًا (8) إِنَّمَا نُطۡعِمُكُمۡ لِوَجۡهِ ٱللَّهِ لَا نُرِيدُ مِنكُمۡ جَزَآءٗ وَلَا شُكُورًا (9) إِنَّا نَخَافُ مِن رَّبِّنَا يَوۡمًا عَبُوسٗا قَمۡطَرِيرٗا (10) فَوَقَىٰهُمُ ٱللَّهُ شَرَّ ذَٰلِكَ ٱلۡيَوۡمِ وَلَقَّىٰهُمۡ نَضۡرَةٗ وَسُرُورٗا (11) وَجَزَىٰهُم بِمَا صَبَرُواْ جَنَّةٗ وَحَرِيرٗا (12) مُّتَّكِـِٔينَ فِيهَا عَلَى ٱلۡأَرَآئِكِۖ لَا يَرَوۡنَ فِيهَا شَمۡسٗا وَلَا زَمۡهَرِيرٗا (13) وَدَانِيَةً عَلَيۡهِمۡ ظِلَٰلُهَا وَذُلِّلَتۡ قُطُوفُهَا تَذۡلِيلٗا (14) وَيُطَافُ عَلَيۡهِم بِـَٔانِيَةٖ مِّن فِضَّةٖ وَأَكۡوَابٖ كَانَتۡ قَوَارِيرَا۠ (15) قَوَارِيرَاْ مِن فِضَّةٖ قَدَّرُوهَا تَقۡدِيرٗا (16) وَيُسۡقَوۡنَ فِيهَا كَأۡسٗا كَانَ مِزَاجُهَا زَنجَبِيلًا (17) عَيۡنٗا فِيهَا تُسَمَّىٰ سَلۡسَبِيلٗا (18) ۞وَيَطُوفُ عَلَيۡهِمۡ وِلۡدَٰنٞ مُّخَلَّدُونَ إِذَا رَأَيۡتَهُمۡ حَسِبۡتَهُمۡ لُؤۡلُؤٗا مَّنثُورٗا (19) وَإِذَا رَأَيۡتَ ثَمَّ رَأَيۡتَ نَعِيمٗا وَمُلۡكٗا كَبِيرًا (20) عَٰلِيَهُمۡ ثِيَابُ سُندُسٍ خُضۡرٞ وَإِسۡتَبۡرَقٞۖ وَحُلُّوٓاْ أَسَاوِرَ مِن فِضَّةٖ وَسَقَىٰهُمۡ رَبُّهُمۡ شَرَابٗا طَهُورًا (21) إِنَّ هَٰذَا كَانَ لَكُمۡ جَزَآءٗ وَكَانَ سَعۡيُكُم مَّشۡكُورًا (22) )
و شرحتله ميار بالراحة الآيات الكريمة عشان يفهم إن ربنا عز وجل هيجازيهم بوش مشرق وسعيد والخمرة فيها طعم تانى احلى و الذ و يلبسوا حرير و قاعدين فى الجنة اللى مش هيحسوا فيها لا برد ولا حر و قاعدين فى سراير مرتاحين و مبسوطين ، نتيجة مجهودهم و سعيهم المادي و الجسماني .
وكملت جيهان إن الولاد قرروا بعد الرحلة دى كل واحد يبدأ يركز فى حاجات أو عمل تدخله الجنة عشان وصف الجنة بالطريقة دي شجعتهم .
ماشاء الله يا جيهان على الولاد ، ربنا يحفظهم و يثبتهم ، فعلا الموقف ده أحلى بكتير من اللي كنا مستنين نسمعه من الرحلة .
اللى حكته صاحبتنا جيهان أثر فينا اوى و عيشنا كل كلمة فيها و تخيلنا زى ما الولاد تخيلوا وصف الجنة ، وزى مس رضوى كانت بتحاول تفكرهم بالجنة عشان تحببهم فى عمل الخير و توصلهم لرضا ربنا بطريقة تناسب سنهم ، إحنا كمان محتاجين نحط الفكرة دى قدامنا و نعيش بيها و نخليها دايما هدفنا وهو دخول الجنة ،ووصلنا أنا و أصحابي ولو نقدر في كل مكان نروحه أو منظر طبيعي نشوفه أو أكلة حلو بنآكلها أو تظهرلنا في صفحات السوشيال ميديا ، نفتكر إن الجنة فيها أحلى واكتر من كدة بكتير ، وزي ما ربنا رزقنا بنعيم الدنيا ربنا الوهاب الكريم يرزقنا نعيم الآخرة .
و كلنا إعترفنا إننا اول مرة نتدبر آيات القرآن الكريم و نسمعها كدة زى ما سمعناها من حكاية جيهان ، كل كلمة فيها قوية و تهز جبل ، و ربنا سبحانه وتعالى من علينا بوصف الجنة بتفاصيلها عشان يجازينا بالأعمال الصالحة و اللي عز وجل برضو ذكرها في قرآنه الكريم ، و سيدنا محمد عليه الصلاة و السلام قالنا (إنَّ في الجنَّةِ مائةَ درجةٍ ما بينَ كلِّ درجَتينِ كما بينَ السَّماءِ والأرضِ، والفِردَوسُ أعلى الجنَّةِ وأوسطُها، وفَوقَ ذلِكَ عرشُ الرَّحمنِ، ومنها تُفجَّرُ أنهارُ الجنَّةِ، فإذا سَألتُمُ اللَّهَ فسَلوهُ الفردوسَ) .
و إذا كان ربنا كرمنا بنعيم الدنيا و شوفنا و زورنا مناظر طبيعية جميلة و حاسينا بجو لا برد ولا حر،زى فصل الربيع وأكلنا من طيبات رزقه من فاكهة و لحمة و خير لا يعد و لا يحصى، ده اكيد عشان نحس بالجنة و نعيمها و يخلينا نشتاق أكتر و أكتر ليها ،
وزي ما الولاد قرروا يختاروا أعمال تدخلهم الجنة بإذن الله تعالى ، إحنا قررنا نتدبر آيات القرآن الكريم لما نسمعه أو نقرى الورد بتاعتنا ، ونركز
فى آيات وصف الجنة، و اللى بيدخلوا الجنة عملوا إيه ، و فرصة نتخيل و ندعى و نتوسل لربنا سبحانه وتعالى ، و فرصة ذهبية إن الحكاية دى توصلنا فى توقيت مناسب ربنا قدره لينا عشان بيحبنا، فرصة نبدأ صفحة جديدة مع تلاوة القرآن الكريم و نقف عند كل كلمة فيها الجنة و نتخيل وندعى و نجهتد على اد ما نقدر و نعمل اللى ربنا آمرنا بيه سبحانه وتعالى و نبعد كل ما نهانا عنه .
انا حبيت أشارككم خواطري وخواطر أصحابي يمكن تكون رسالة ربانية لحد يقرآها أو يأثر بيها زي ما إتأثرنا بيها ونسأل الله أن يدخلنا جنات الفردوس الأعلى بدون حساب ولا سابقة عذاب
و صلي اللهم و سلم و بارك على سيدنا محمد وعلى آله و صحبه أجمعين .
