حكايتنا
ساعات في زحمة وسرعة الحياة بتمر علينا مواقف وأحداث مش عارفين حصلت ليه ولا بنفكر فيها وتعدي علينا مرور كرام ، ولما نقعد مع نفسنا نكتشف بإن الموقف ده مش موقف وخلاص ، ده بيعلمنا دروس كتيرة وخبرات بتتراكم سنين وشخصيتك بتتغير للأحسن وإنت مش واخد بالك .
وساعات القعدة مع نفسنا بتكون مع ناس شبهنا في نفس أفكارنا وطبعنا زى أصحابنا ، أهلنا ، زمايلنا في الشغل والدراسة أو حتى جيرانا ، وساعتها تكون القعدة دي فضفضة ومن القلب للقلب ، ومش عايز من الفضفضة دي غير إنك تطلع أفكارك وتتكلم عن نفسك من غير تحفظ ولا تكلف وساعات تطلع منها بتجربة أو فكرة أو رسالة ربانية ، ربنا سبحانه وتعالى أنعم عليك بيها وجاتلك عشان تنور طريقك أو تفصل عن حياتك الزحمة فضل منه ورحمة عز وجل .
أصحابي التمانية وأنا قعدنا القعدة دي سنين طويلة وإتكلمنا وضحكنا وبكينا على موقف ممكن يكون بسيط من وجهة نظرنا ، بس بعد ما فضفضنا طلعنا بخواطر وتأملات فكرية من مواقف روتينية يومية ، ساعدتنا كتير في حياتنا وزودت من نضجنا وخبراتنا و حاسينا بهدوء شوية في زحمة حياتنا .
حبيت أشارككم خواطرنا وجمعتهم في صفحة يمكن تلاقى الرسالة الربانية اللي مستنيها أو يمكن تكون حل لمشكلة بتمر بيها أو يمكن تكون راحة سريعة في عز إنشغالك بالروتين اليومي في حياتك أو تتأكد أن ربنا سبحانه وتعالى قريب منك أقرب مما تتخيل وتلاقي الطمأنينة اللى قلبك محتاجها ومستنيها .
ويلا بينا تشاركنا قعدتنا ولمتنا وأتمنى ليك قراءة ممتعة وعميقة.
إزاي تقرا الخواطر؟
كل خاطرة بتبدأ بموقف عادي جداً حصل في قعدة من قعداتنا: فطار الصبح قبل الشغل، رحلة، زيارة، أو حتى فنجان شاي. بنحكيه زي ما حصل، بكلامنا وضحكنا وخناقاتنا الصغيرة، وبعدين بنقف عنده ونتأمل فيه، لحد ما نوصل للرسالة اللي فيه من كلام ربنا سبحانه وتعالى وسنة سيدنا محمد عليه الصلاة والسلام.
- بالترتيب: الخواطر مرقّمة، ولو قريتها من الأولى هتتعرف على أصحاب اللمة واحدة واحدة.
- حسب اللي في قلبك: لو في حاجة شاغلاك النهارده، ادخل على الباب اللي يناسبها.
- على مهلك: احفظ الخاطرة في «قائمتي» وارجعلها وقت ما تحب.
أبواب الخواطر
- سلامة القلب: المشاعر والنفس، التعلق، القلق، الهم والحزن، والتفكير المفرط.
- يقين وتوكل: الإيمان والرضا، توقيت الفرج، وشكر النعم.
- أنا والناس: العلاقات والتعامل مع اللي حوالينا.
- شغل وحياة: السعي والشغل والرزق وتفاصيل اليوم العادي.
- تأملات في خلق الله: حكمة ربنا في خلقه، من خلق آدم لحد الفصول الأربعة.
خليك في اللمة
في خاطرة جديدة كل أسبوع إن شاء الله. تقدر تبدأ من كل الخواطر، ولو عندك موقف حصلك وحابب تشاركه أو رأي في خاطرة، ابعتلنا، يمكن تكون موضوع قعدتنا الجاية.
