اتفقت مع أصحابي نخرج اليوم اللي بعده الصبح بدري، نفطر مع بعض قبل ما نروح الشغل، أو كل واحد يبدأ يومه.

دخلت صاحبتنا رانيا علينا ووشها متغير، وحسّينا إن عندها مشكلة.

من اللمةمالك يا رانيا؟ إيه اللي حصلك من امبارح؟ كنتي كويسة بالليل؟!!!

ردت بحسرة شديدة:

رانياالغاز ما اشتغلش النهاردة، ومعرفتش أشرب القهوة والشاي بلبن بتوعي.

نهىإحنا افتكرنا عندك مصيبة، وقّعتي قلبنا! كل الحزن ده عشان القهوة والشاي بلبن؟ طيب ما تشربيهم معانا.

من اللمةأو كان ممكن يا نهى تسخّن المية في الكاتل وتسخّن اللبن في الميكروويف، يعني مش أزمة.

ردت رانيا بمنتهى الاستغراب:

رانيالأ طبعًا، أنا عندي طقوس يومية؛ لازم أسخّن اللبن في كنكة معينة، وأحط الشاي مع اللبن في مج معين، ولازم بعدها أعمل القهوة بنفسي في كنكة تانية، وأشربها على الكرسي بتاعي، غير كدة مزاجي بيقل. زي دلوقتي، أنا مش عارفة أركز، ومش عارفة هأروح الشغل إزاي!!!

من اللمةطيب إزاي بتصومي رمضان سنين طويلة وبتركزي في الشغل، وعمرنا ما حسّينا إنك بتتعبي أو مش عارفة تركزي زي النهاردة؟!!!

رانياعشان بأعمل نفس الحاجتين دول قبل السحور، وممكن ما أتسحرش غيرهم.

من اللمةفهمنا، يعني دي طقوس وروتين يومي؟

رانيابالضبط كدة.

من اللمةبس يا رانيا دي طقوس وعادة فيها إدمان، وشكلك متعلقة بالعادة اليومية دي.

رانياآه طبعًا، وبأكون مضايقة جدًا في اليوم اللي معرفش أعملها فيه، لو في سفر ولا أي ظرف زي النهاردة، وفي نفس الوقت بأكون مضايقة إني متعلقة بعادة بتتملك مني أوي كدة.

ديناعندك حق يا رانيا، أنا زيك متعلقة بالقطة بتاعتي، وبأتجنن لو اتعورت، لدرجة إني بأخاف كل يوم إني أفقدها، وسنها بيكبر سنة ورا سنة.

من اللمةفعلًا يا دينا، أنا عندي قلم سنون كان جالي هدية من جدي الله يرحمه وأنا في الجامعة، وبأستخدمه لحد دلوقتي وبأحافظ عليه زي عيني، وبأترعب لو ضاع أو يحصله حاجة.

أمانيوأنا زيكوا، كنت بأستغرب أوي لما حد يقولي ما تتعلقيش بأي حاجة، من فكرة جواكي أو مكان أو شخص، أو حتى حاجات بسيطة زي مقتنياتك الشخصية… بس كله إلا شنطتي البني.

نيفينأنا كنت يا أماني متعلقة بمدرّستي في المدرسة، لدرجة إنها لما تخلص الحصة كنا بنجري وراها كلنا. هي كانت محبوبة جدًا، بس كانت بتتضايق من فرط الحب والتعلق ده، ولما سمعنا إنها هتمشي، كلنا قعدنا نعيط بحرقة، كإنه بعد الشر حد عزيز عندنا اتوفى.

كانت دايمًا بتقولنا: كدة غلط، والمشاعر دي زايدة عن حدها، وهتأذيكوا وهتتعبكوا. ولما مشيت حسّيت بحزن شديد واجع قلبي، كنت صغيرة أوي ومكنتش فاهمة ليه اتعلقت بيها أوي كدة.

من اللمةالتعلق يا نيفين مشاعر سلبية، وبتوجع القلب أكتر من سعادته، زي العادة اليومية اللي بتعملها رانيا؛ المفروض إنها بتسعدها، بس بالعكس بتألمها لما تفتقدها، حتى ولو ليوم واحد.

جيهانأنا كنت متعلقة بمنطقة مصر الجديدة، اللي كانت فيها ذكريات طفولتي وبيت جدتي الله يرحمها، وكنت كل أسبوع آخد الولاد وأمشي بالعربية في نفس الشارع اللي كنت بأتمشى فيه وأنا صغيرة مع إخواتي، لحد ما معالم المنطقة اتغيرت والشارع تقريبًا اتلغى، حزنت جدًا عشان معرفتش أمشي فيه تاني.

من اللمةطبعًا يوسف وميار ولادك فرحوا؟

جيهانآه طبعًا، كانوا كمان شايفين إني مزوّداها أوي.

من اللمةطبعًا يا جيهان، عشان اللي يزيد عن حده ينقلب ضده. أنا كنت متعلقة زيك كدة بمحل في وسط البلد، كنا دايمًا بنجيب منه لبسنا وإحنا صغيرين، ولحد فترة قريبة كنت بأجيب منه لبس الولاد، والولاد اتخانقوا معايا عشان بنروحله من التجمع، غير إن الموديلات هناك مش بتعجبهم.

أمانيأنا كنت متعلقة بمامتي جدًا، لدرجة لما كانت بتسافر المصيف، وأنا متجوزة وليّا بيت مستقل، كنت بأتضايق جدًا إنها بعيدة عني، ولما اتوفت حسّيت كإن قلبي اتنزع من جوايا، وطبعًا حضرتوا كلكوا حالتي كانت عاملة إزاي، وسبحان الله اللي قدّرني وقدرت أقف تاني على رجلي. بعدها قررت إني ما أتعلقش بحد، حتى ولو كانوا ولادي.

من اللمةصعب أوي يا أماني ما تتعلقيش بولادك!

شيرينطبعًا صعب، بس في فرق ما بين إنك تحبي ولادك وتخافي عليهم وقلبك بياكلك عليهم، وفرق كبير إنك تتعلقي بيهم لدرجة الجنون. التعلق هنا بيكون مشاعر غير صحية، وكمان بيوصّل الولاد إنهم يضايقوا منك.

إيمانكلامك صح جدًا يا شيرين، أنا فاكرة عمي لما ربنا رزقه ببنته الوحيدة بعد حرمان 15 سنة، كان متعلق بيها جدًا، لدرجة إنه قفل عيادته عشان ياخد باله منها وما تفارقش عينه لحظة، وكان دايمًا بيوصّل بنته المدرسة، ولحد ما دخلت الجامعة كان بيستناها طول اليوم لحد ما تخلص محاضراتها ويوصّلها البيت، عشان بيخاف عليها تروح لوحدها، لدرجة إن البنت اشتكت لباباها إن ده بيسببلها إحراج مع زمايلها، ودايمًا حاسة إنها محاصرة، وحاسة إنها لسه طفلة.

من اللمةطبعًا يا إيمان، هتحس إن المشاعر دي بتخنقها. في الحالة دي الطرفين بيكونوا تعبانين؛ بدل ما تاخد مشاعر الأبوة بالحب والسند، خدت مشاعر التعلق والخوف والاستحواذ من فرط تعلقه بيها، والأب نفسه مش بياخد مشاعر بنته الطبيعية.

إيمانبس برضو الواحد بيكون غصب عنه، وكمان الواحد ما اتعرضش لنفس موقفه، كان ممكن أتعلق ببنتي الوحيدة بعد حرمان سنين طويلة.

نهىبس لازم يا إيمان الواحد يتحكم في مشاعر التعلق دي.

من اللمةإنتي يا نهى بتقولي كدة؟!!! مش فاكرة موبايلك اللي كان معاكي سنين طويلة، وكانت حالته صعبة جدًا ومتكسر من كل حتة؟

نهىياه، فكرتوني ليه!!! ده كان عزيز على قلبي أوي، كنت بأستخدمه وقعدت أصلّحه سنين، وكل الناس كانت بتتريق عليّا من منظره، لحد ما كنت في اجتماع في الشغل وفجأة رن لوحده، ومعرفتش لا أعمله صامت ولا أوقفه، وسببلي إحراج وقتها، واضطريت أتخلى عنه.

من اللمةالحمد لله، بجد ارتحنا منه، وارتحنا من خوفك عليه.

من اللمةأنا بقى غيركم خالص؛ لا بأتعلق بالمكان ولا الأشخاص ولا مقتنياتي الشخصية، أنا بأتعلق بفكرة جوايا أو رأي معين، وأفضل أتمسك بيها كأنها نهاية العالم، حتى لو أثبت لنفسي إنها غلط.

وقعدنا يوميها نتكلم عن المشاعر السلبية اللي بنحسها من فرط التعلق بكل الحاجات دي، ومفيش أحسن من الوسطية، لا إفراط ولا تفريط. والاعتدال في المشاعر والتصرفات والأفكار مهم جدًا، بالذات إن إحنا بنعيش الحياة مع ناس مختلفة عنك، فطبيعي آراءك تكون مختلفة عنهم، والمفروض ما نتعلقش بفكرة ولا بحاجات تخليهم يضايقوا منك، ولا تتعلق بيهم شخصيًا كمان، عشان الواحد ما يستهلكش صحته ونفسيته ومشاعره بزيادة تخليه مش قادر يكمل وسط زحمة الحياة، وهتوصل للدرجة اللي وصلتلها صاحبتنا رانيا وقالتلنا: مش عارفة أركز.

قريت مرة إن لما تيجي دعوة حق، زي دعوة رسولنا عليه الصلاة والسلام، مهمة وفيها دعوة للإسلام وللعقيدة وتوحيد ربنا، بيحصل فيها 3 أنواع من التعلق: التعلق بالمكان، والتعلق بالأشخاص، والتعلق بالفكرة، والدين الإسلامي عالج كل واحدة فيهم.

الدين الإسلامي كان فكرة؛ عشان لما دعا سيدنا محمد عليه الصلاة والسلام المشركين إنهم يقولوا «لا إله إلا الله»، دي كانت فكرة الدين الإسلامي: فكرة توحيد ربنا سبحانه وتعالى وعدم الشرك به، من عبادة الأصنام وغيره. وده علاج التعلق بفكرة الشرك، وإزاي نتخلى عن فكرة التعلق بالآراء والأفكار.

وكانت كبيرة أوي على أهل مكة التخلي عن معتقداتهم اللي ورثوها من آبائهم وأجدادهم، ويتمسكوا بتوحيد ربنا ولا يشركوا به شيئًا.

وحصلت الهجرة عشان ما يتعلقوش بالمكان، وهو مكة. وبعد ما اشتد أذى قريش للرسول عليه الصلاة والسلام واللي أسلموا معاه، ربنا عز وجل أمره يهاجر من مكة إلى المدينة، وقبل ما يسيب مكانه اللي اتولد وعاش فيه، وقف على مكان مرتفع، وكان بيكلم مكة، وقال عليه الصلاة والسلام:

«واللَّهِ إنَّكِ لخيرُ أرضِ اللَّهِ، وأحبُّ أرضِ اللَّهِ إلى اللَّهِ، ولولا أنِّي أُخرِجتُ منكِ ما خرجتُ»

تخيلوا سيدنا محمد عليه الصلاة والسلام ساب مكة اللي متعلق بيها، والكعبة وبيت ربنا، عشان ربنا عز وجل أمره بالهجرة، وده عشان يكون درس لينا وقدوة منه عليه الصلاة والسلام إننا ما نتعلقش بأي مكان حتى لو كان غالي عندنا، ونسيب المكان عشان فكرة الدين الإسلامي «لا إله إلا الله».

وفي غزوة أحد حصلت إشاعة إن سيدنا محمد عليه الصلاة والسلام قُتل، وحصلت صدمة كبيرة للمسلمين، وعالج الدين الإسلامي فكرة التعلق بالأشخاص، وربنا نزّل وقتها الآية الكريمة:

﴿وَمَا مُحَمَّدٌ إِلَّا رَسُولٌ قَدْ خَلَتْ مِن قَبْلِهِ الرُّسُلُ ۚ أَفَإِن مَّاتَ أَوْ قُتِلَ انقَلَبْتُمْ عَلَىٰ أَعْقَابِكُمْ ۚ وَمَن يَنقَلِبْ عَلَىٰ عَقِبَيْهِ فَلَن يَضُرَّ اللَّهَ شَيْئًا ۗ وَسَيَجْزِي اللَّهُ الشَّاكِرِينَ﴾

سورة آل عمران: 144

وكدة يبقى التعلق الوحيد بالفكرة، وهي فكرة الدين الإسلامي «لا إله إلا الله»، والتخلي عن فكرة الشرك، والتعلق بأي حاجة، سواء مكان حتى لو كان مكة المكرمة، ولا التعلق بشخص حتى لو كان سيدنا محمد عليه الصلاة والسلام، ويبقى دايمًا وأبدًا التعلق بالله عز وجل وحده لا شريك له.

والتعلق بالله سبحانه وتعالى وحده أساس الإيمان وسلامة القلب، والبعد عن كل ضيق وحزن ومشاعر تعلق مفرطة وغير صحية.

أنا خلصت كلامي، وأتمنى أكون وصلت وجهة نظري، واللهم لا تعلّق قلبنا إلا بك.

وصلِّ اللهم وسلم وبارك على سيدنا محمد وعلى آله وصحبه أجمعين.